ГБУ РС (Я) «Ресурсный центр социальной защиты «Победа»
при Министерстве труда и социального развития РС (Я)

Бүлүүгэ «Активное долголетие» -доруобуйа дьаарбаҥката

Бүлүүгэ «Активное долголетие» -доруобуйа дьаарбаҥката

Муус устар ый 14 күнүгэр Бүлүүгэ В.О. Каратаев аатынан Олоҥхо Дьиэтигэр бэрт сэргэх тэрээһин буолан ааста. Сарсыарда эрдэттэн куорат олохтоохторо ох курдук оҥостон, тир курдук тэринэн доруобуйаларын туругун бэрэбиэркэлэтэ таарыйа, анал испэсэлиистэр сүбэлэрин-амаларын ылаары, маастар кылаастарга уопут атастаһаары муһуннулар.

Тустаах испэсэлиистэр кэлбит дьон саахардарын, холестериннарын, хааннарын баттааһыннарын кээмэйдээн доруобуйаларын туругун утары этэн биэрдилэр.

Тэрээһин Бүлүү улууһун дьаһалтатын эдэр ыччат политикатын салаатын начальнига Аксиния Андреевна Кудайбердиева кэлбит дьону эҕэрдэлээһиниттэн, туох-хайдах тэрээһин буоларын сырдатыытыттан саҕаланна. Салгыы Медицинскэй өҥөнү оҥорор кабинет бырааһа Антонина Егоровна Дмитриева хайдах уһуннук олоруохха сөбүн туһунан сырдатыы оҥордо, ону сэргэ хамсаныыннан чэбдигирии ньымаларыгар үөрэттэ. Сөпкө аһыыр наадалааҕын тоһоҕолоон эттэ.


Тэрээһин ыалдьыттарынан улууска эрэ буолбакка өрөспүүбүлүкэҕэ биллэр, холобурга сылдьар дьоммут: Чэпчэки атлетикаҕа, полу-марафонҥа, бэтэрээннэр икки ардыларыгар 20 килэмиэтиргэ чемпиона,чэпчэки атлетикаҕа спорт маастара Григорий Яковлевич Мосов уонна Росгвардия үлэһитэ, марафонскай дистанция икки төгүллээх чемпиона, 30 килэмиэтиргэ (малай марафонҥа) өрөспүүбүлүкэ икки төгүллээх чемпиона, саха сирин спартакиадатын уонна Манчаары Баһылай бирииһигэр спартакиадалар хас да төгүллээх призердара Саха сирин чэпчэки атлетикаҕа спордун маастара Альберт Прокопьевич Софронов буоллулар.

Сааһыра барбыт киһи өйу-санааны эрчийиитигэр илиинэн оҥоһугунан дьарыктаныы саамай туһалаа5ынан аа5ыллар, онуоха доруобуйа дьаарбаҥкатыгар уран тарбахтаах а5ам саастаах дьон тумсуулэрэ бэйэлэрин быыстапкаларын туруордулар.


Бүлүүтээҕи дьиэ кэргэҥҥэ уонна ыччакка социальнай- психологическай өҥөнү оҥорор киин үлэһитэ Варвара Никитична Федорова Психосоматика диэн бэрт интэриэһинэй тренини ыытта.

Үбү-харчыны хайдах туттары, түөкүттэртэн хайдах харыстанары Сбербанк Бүлүүтээҕи салаатын салайааччыта Марианна Петровна Спиридонова, Алмазкредитсервис Бүлүүтээҕи салааатын салайааччыта Мария Петровна Павлова, полиция үлэһиттэрэ полиция майора Михаил Иннокентьевич Тимофеев уонна юстиция подполковнига Михаил Викторович Назаров олус өйдөнүмтүөтүк уонна ылыннарыылаахтык быһааран, кэпсээн биэрдилэр.